ელექტროენერგიისა და გაზის გადასახადების გაძვირება დადასტურებულია. კონკრეტულად რამდენით მოიმატებს ტარიფი, ჯერჯერობით უცნობია. სემეკის თავმჯდომარის  დავით ნარმანიას განცხადებით, მოსალოდნელი ცვლილების შესახებ ცნობილი გახდება საჯარო სხდომაზე, რომელიც დეკემბრის ბოლოს გაიმართება.  დანამდვილებით ცნობილია, რომ წყალმომარაგების  ტარიფი ამ ეტაპზე არ შეიცვლება და  2026 წლის ბოლოს გადაიხედება.

"ქართული ოცნება" "ცარიელ პროპაგანდისტულ" მესიჯებს უწოდებს ევროკავშირის საბჭოს თავმჯდომარეობის მიერ გაფართოებასთან დაკავშირებით გამოტანილ დასკვნაში საქართველოზე გაკეთებულ აქცენტებს. მმართველი პარტია ამბობს, რომ ევროკავშირისგან ასეთი დამოკიდებულება მათთვის მიუღებელია. ოპოზიციაში კი ამბობენ, რომ ევროსტრუქტურები ვალდებულები არიან შეაფასონ კანდიდატ ქვეყანაში არსებული ვითარება, დოკუმენტი რეალობას აღწერს და "ამ შეფასებებში არაფერი უცნაური არაა.

საქართველოს მთავრობის მეთაური აშშ-ს კვლავ სთავაზობს ურთიერთობის სუფთა ფურცლიდან დაწყებას - ირაკლი კობახიძე გულისხმობს სტრატეგიული პარტნიორობის განახლებას "კონკრეტული გზამკვლევით", სადაც ასახული იქნება "ორმხრივი სარგებელი". თუმცაღა, ჯერ აშშ-სგან შემხვედრი ნაბიჯები არ ჩანს, არც მათ შორის საელჩოს დონეზე.

ტურიზმის სექტორში, განსაკუთრებით გიდების პოზიციაზე მომუშავე უცხოელი კადრების საქმიანობას ინდუსტრიის წარმომადგენელთა ნაწილი ნეგატიურად აფასებს და აცხადებენ, რომ უცხოელებს ქართულ ბაზარზე მონოპოლია აქვთ აღებული. ამიტომაც შესაბამისი უწყებების მხრიდან რეაგირებას ითხოვენ. ნაწილი კი ფიქრობს, რომ საკითხი არც ისე მწვავეა როგორც ამას აყენებენ, რადგან ამ კუთხით ოფიციალური მონაცემები არ არსებობს და დაზუსტებით ცნობილი არ არის რამდენი უცხოელი გიდი ან ტუროპერატორი მუშაობს საქართველოში. 

ენერგეტიკა ქვეყნის ეკონომიკის განვითარების მთავარი ქვაკუთხედია. საქართველოს კი ამ მხრივ, უდიდესი პოტენციალი აქვს, როგორც ჰიდრორესურსების, ასევე განახლებადი ენერგიის განვითარების თვალსაზრისით. ამ ფონზე, რაოდენ უცნაურიც არ უნდა იყოს, ქვეყანას ენერგეტიკის სამინისტრო არ გააჩნია. დარგის პროფესიონალები უკვე ღიად საუბრობენ, რომ აუცილებელი და საჭიროა სამინისტროს სრულად აღდგენა. 

„ბიბისის" გახმაურებულ სიუჟეტთან დაკავშირებით პარლამენტში საგამოძიებო კომისიის შექმნაზე გადაწყვეტილება სამშაბათს უნდა მიეღოთ, თუმცა ეს 17 დეკემბრისთვის გადაიდო. ოპოზიცია ფიქრობს, რომ მმართველმა პარტიამ მიზანმიმართულად შეარჩია ამ თემის განხილვისათვის ზამთრის საპარლამენტო სესიის ბოლო დღე, რათა ეს საკითხი „ჩაფარცხოს". ამასთან, საქართველოს ხელისუფლება აგრძელებს „ბიბისის" წინააღმდეგ სარჩელზე მუშაობას და პარალელურად გაირკვა, რომ აშშ-ის პრეზიდენტი დონალდ ტრამპი ასევე უჩივის „ბიბისის" ცილისწამებისათვის.

ოპოზიციაში კვლავ დაპირისპირებაა - პარტიების ნაწილის მხრიდან დიდი უკმაყოფილება მოყვა ენმ-ის წევრის ლევან სანიკიძის განცხადებას, რომ ქართული პოლიტიკა 13 წელია „ნაციონალური მოძრაობის" გარშემო ტრიალებს და სხვა ოპოზიციურ პარტიებს საკუთარი იდენტობა თითქმის არ აქვთ. საინტერესოა, რომ ასეთ შეფასებას „ოცნებაში" ეთანხმებიან.

ბოლო ორ კვირაში რუსეთის საგარეო საქმეთა სამინისტრომ ორი განცხადება გააკეთა საქართველოსთან ურთიერთობის აღდგენის თემაზე. 3 დეკემბერს სერგეი ლავროვის უწყება აცხადებდა, რომ აფხაზეთთან და ე.წ. სამხრეთ ოსეთთან დაკავშირებით ოფიციალური თბილისის პოზიციის გამო, დიალოგის განახლებისთვის არანაირი წინაპირობა არ არსებობს. 16 დეკემბერს კი იგივე უწყება აცხადებს, რომ „რუსეთი სერიოზულადაა მომართული საქართველოსთან ურთიერთობების ნორმალიზებისთვის" და ამ განცხადებაში ოკუპურებული ტერიტორიები უკვე აღარაა ნახსენები.

ბერლინის ორდღიანი კონსულტაციების შემდეგ, სამშვიდობო პროცესში ჩართული ყველა მხარე ოპტიმისტურ განცხადებებს აკეთებს. წინასწარი ინფორმაციით, პრაქტიკულად გადაწყვეტილია უკრაინისათვის ნატო-ს წესდების მე-5 პუნქტის მსგავსი გარანტიის მიცემა, რომელიც იურიდიულად სავალდებულო იქნება. გაიმართა აშშ-სა და რუსეთის პრეზიდენტების სატელეფონო საუბარიც. ყველაზე ოპტიმისტური სცენარით კი, უკვე ამ შაბათ-კვირას მაიამიში შეიძლება უკვე დაპირისპირებული მხარეების წარმომადგენელი სამხედროებიც შეიკრიბნონ რუკებისა და ზავის კონკრეტული დეტალების შესათანხმებლად.

ექსპორტი ისტორიულ მაქსიმუმს აღწევს. დადებითი დინამიკა მიუთითებს საგარეო ვაჭრობის მზარდ ტენდენციაზე, რასაც, თავის მხრივ, განაპირობებს  რეექსპორტის ზრდა, ტრანზიტული ფუნქციის გაუმჯობესება და ზოგადად გლობალურ ეკონომიკაში მიმდინარე ცვლილებები, რასაც რუსეთ-უკრაინის ომის პერიოდიდან დაედო საფუძველი და დღემდე გრძელდება.

ევროკომისარი გაფართოების საკითხებში მარტა კოსი იმედს გამოთქვამს, რომ საქართველოს ხელისუფლება ევროპულ გზას დაუბრუნდება. განცხადებას "ოცნებაში" თვალთმაქცობას უწოდებენ, ოპოზიციაში კი მიაჩნიათ, რომ კოსის გზავნილი პირდაპირი ნიშანია, რომ ქვეყანას ევროკავშირში ინტეგრაციის რეალური შანსი კიდევ აქვს.

ლარის გამყარების პროცესი გრძელდება. როგორც ფინანსიტები აღნიშნავენ, რეალურად ეროვნული ვალუტა კიდევ უფრო მყარი უნდა იყოს, მაგრამ ამას ცენტრალური ბანკის ინტერვენციები აფერხებს. სავარაუდოდ, სებ-ი ცდილობს, ზედმეტად არ გაძლიერდეს ლარი, პარალელუყრად დოლარის შესყიდვას აგრძელებს და სხვადასხვა მექანიზმით ხელს უშლით ლარის პოზიციების გაუმჯობესებას, ვინაიდან უფრო მეტად გამყარებული ეროვნული ლარი  ეკონომიკის ზრდისა და ექსპორტისთვის შემაფერხებელს გარემოებად იქცევა.