საქართველოს ეროვნული ბანკი სავალუტო რეზერვებს ყველა არსებულ პროგნოზს აჭარბებს და ყველაზე დიდი ტემპით ავსებს. თუკი წლის ბოლომდე მაჩვენებელი დაახლოებით 7 მილიარდი დოლარი უნდა ყოფილიყო, რეზერვების მოცულობამ ეს ნიშნული კარგა ხანია გადალახა და 8 მილიარდს აჭარბებს. მიუხედავად იმისა, რომ მყარი რეზერვები ქვეყნის ფინანსური სტაბილურობისთვის მნიშვნელოვანია, პროცესს მეორე მხარეც აქვს: შესყიდული დოლარის სანაცვლოდ ბრუნვაში ლარის მასა იზრდება, რაც, თავის მხრივ, ინფლაციას ასტიმულირებს. ეკონომიკურ სივრცეში სეროზული განხილვის საგანი ხდება საკითხი, სავალუტო რეზერვების შესყიდვის ამჟამინდელი ტემპი რამდენად სახარბიელოა.

"ქართულ ოცნებაში" აცხადებენ, რომ ევროკავშირმა პრაგმატული მიდგომის შემთხვევაში საქართველოს მოსახლეობის მიერ არჩეულ ხელისუფლებასთან უნდა ისაუბროს. მათი შეფასებით, ხელისუფლება საკუთარი პოზიციისა და დამოკიდებულების შეცვლას ვერ დაიწყებს იმის მიხედვით, მოეწონება თუ არა ის ევროკავშირის რომელიმე პოლიტიკოსს.

გერმანიის კანცლერის, ფრიდრიხ მერცის განცხადებით, საქსონია-ანჰალტში ჩატარებულ საპარლამენტო არჩევნებში პარტიის - „ალტერნატივა გერმანიისთვის" გამარჯვებამ მისი პარტია, „ქრისტიან-დემოკრატიული კავშირი" საფუძვლიანად შეარყია და აჩვენა, რომ პარტიაში სერიოზული გადაფასების საჭიროება დადგა, - ინფორმაციას „გარდიანი" გერმანულ მედიაზე დაყრდნობით ავრცელებს.

„ეს ჩვენს პარტიას საფუძვლებამდე არყევს. ჩვენ უბრალოდ ძველებურად ვეღარ გავაგრძელებთ - ვერც მე და ვერც ფედერალური მთავრობა", - განაცხადა მერცმა.

პრემიერ-მინისტრი ირაკლი კობახიძე თანამდებობის დატოვებას არ აპირებს და მთავრობის შესაძლო ცვლილებებზე გავრცელებულ ინფორმაციას არ ადასტურებს. ამასთან, კობახიძე უარყოფითად აფასებს გავრცელებულ ცნობას, თითქოს პრემიერ-მინისტრის პოსტის დაკავებას ზურაბ პატარიძე გეგმავს და აღნიშნულ ინფორმაციას "ჩორტაობას" უწოდებს.

ირანის პარლამენტის თავმჯდომარის, მოჰამედ ბაღერ ღალიბაფის განცხადებით, „სანამ ძალიან გვიან არ არის" აშშ-მა უნდა გაიგოს, რომ თამაშის წესები შეიცვალა. ინფორმაციას „როიტერსი" ავრცელებს. „ამიერიდან, ირანის ინტერესებისა და უსაფრთხოების წინააღმდეგ ნებისმიერ თავდასხმას უფრო სწრაფი, მძიმე და მტკივნეული პასუხი მოჰყვება", - განაცხადა ირანის პარლამენტის თავმჯდომარემ.

„კოალიცია ცვლილებებისთვის" ლიდერი ნინა გვარამია პარლამენტის თავმჯდომარის მოადგილეს ნინო წილოსანს ღიად ემუქრება და აცხადებს, რომ ხელისუფლების ცვლილების შემდეგ ვიცე-სპიკერს „ბევრი რამის მოყოლა" მოუწევს. ექსპერტების შეფასებით, მსგავსი მუქარის შემცველი განცხადებები, კონკრეტული მტკიცებულებების წარმოდგენის გარეშე, თავად ოპოზიციას აზიანებს.

ახლო აღმოსავლეთში კონფლიქტის გამო დროებით „გვერდზე გადადებული" უკრაინის საკითხი კვლავ ბრუნდება დღის წესრიგში. აშშ-ის პრეზიდენტის სპეცწარმომადგენლებმა ამ შაბათ-კვირას ახალი სამშიდობო მისია დაიწყეს. არაოფიციალური წყაროებით, ვაშინგტონის ახალი სამშვიდობო ინიციატივა ფრონტის ხაზის დე ფაქტო გაყინვას, უკრაინის ნატო-ში გაწევრიანების პროცესის შეჩერებასა და სანაცვლოდ მისთვის უსაფრთხოების მრავალმხრივ გარანტიებს ითვალისწინებს.

მმართველ პარტიაში მიიჩნევენ, რომ ოპოზიცია მიზანმიმართულ კამპანიას აწარმოებს ტერიტორიული მთლიანობის წინააღმდეგ. ხელისუფლების შეფასებით, ცალკეული ოპოზიციონერების, მათ შორის ექსპრეზიდენტ მიხეილ სააკაშვილისა და სხვა ლიდერების განცხადებები საქართველოს ტერიტორიული მთლიანობის საკითხს აზიანებს და აფხაზურ საზოგადოებაში საქართველოს მიმართ უარყოფით განწყობებს აძლიერებს.

პატიმრობაში მყოფ ექსპრემიერ ირაკლი ღარიბაშვილის გარშემო განვითარებულმა მოვლენებმა, მმართველი პარტიის მხარდამჭერებში კითხვები და მოლოდინი გააჩინა. განსაკუთრებით ეს იგრძნობა სოციალურ ქსელებში. „ქართული ოცნების" მხარდამჭერთა მნიშვნელოვანი ნაწილი მოელის, რომ პარტიის საპატიო თავმჯდომარე ღიად ჩაერთვება პროცესში და ამა თუ იმ ფორმით დააფიქსირებს თავის პოზიციას.

გარდაცვლილ ლაზარე ჯორბენაძის საქმეზე მაგისტრატი მოსამართლის წინაშე ოპოზიციის, მედიისა და პოლიტიკური ჯგუფების წარმომადგენელთა გამოკითხვა მიმდინარეობს, რასაც მწვავე პოლიტიკური შეფასებები და უმრავლესობა-ოპოზიციის ურთიერთბრალდებები მოჰყვა.

ევროკომისარი გაფართოების საკითხებში, მარტა კოსი ევროკავშირის გაფართოებას აანონსებს და აცხადებს, რომ 2026 წელი რეკორდულია, პროცესი ოთხი მიმართულებით, მათ შორის ეტაპობრივი ინტეგრაციით წარიმართება. ანალიტიკოსების ვარაუდით, საქართველოს საკითხი არ განიხილება, აღნიშნული განცხადება კი უფრო მოლდოვას ან ბალკანეთს ეხება.

თბილისის საქალაქო სასამართლომ მიგრაციის დეპარტამენტის მოთხოვნის საფუძველზე მიიღო გადაწყვეტილება, რომლის მიხედვითაც რუს ოპოზიციონერ აქტივისტ დენის კულანინს მიეცა 7 დღე საქართველოს ტერიტორიის ნებაყოფლობით დასატოვებლად. კულანინი საჯაროდ უჭერდა მხარს უკრაინას და გმობდა რუსეთის აგრესიას, მისი რუსეთში იძულებითი დაბრუნება სახიფათოდ მიიჩნეოდა. ეს გადაწყვეტილება კი მას საშუალებას აძლევს, მესამე, უსაფრთხო ქვეყანაში გაემგზავროს.