სტატისტიკის ეროვნული სამსახურის ინფორმაციით, იანვარში რეალური მთლიანი შიდა პროდუქტის ზრდამ 8.8% შეადგინა. იანვარ-თებერვლის საშუალო მაჩვენებელი კი - 8.4%-ია. სპეციალისტების ვარაუდით ეკონომიკურ ზრდას მომდევნო თვეებშიც უნდა ველოდოთ, განსაკუთრებით ირანსა და ახლო აღმოსავლეთში შექმნილი საომარი მოქმედებების ფონზე. ანალიტიკოსები ამას იმით ხსნიან, რომ საქართველო ერთადერთი ქვეყანაა რეგიონში, რომელიც სტაბილურად ვითარდება და რაც მთავარია, მშვიდობას ინარჩუნებს. შესაბამისად, ინვესტორები შეეცდებიან, საკუთარი კაპიტალი უსაფრთხო ადგილზე გადამოიტანონ. 

ირანის ისლამური რესპუბლიის ელჩი თბილისში მუქარანარევ განცხადებას ავრცელებს, სეიედ ალი მოჯანი აშშ-ს ადმინისტრაციასა და დონალდ ტრამპს ახსენებს და დასძენს, რომ „გუშინ ვინც მათ მხარი აუბა, დღეს იძულებულები არიან ამის ფასი გადაიხადონ". განცხადება დროში ემთხვევა სახელმწიფო მდივან მარკო რუბიოსა და პრემიერ ირაკლი კობახიძის სატელეფონო საუბარს.

საწვავის გაძვირებისა და ელექტროენერგიის ტარიფების ზრდის მიუხედავად, პურის ფასის შენარჩუნებას მწარმოებლები ამ ეტაპზე მაინც ახერხებენ. ინდუსტრიის წარმომადგენლები აცხადებენ, რომ ძირითადი პროდუქტი მომხმარებლამდე უცვლელ ფასად მივა, თუმცა პარალელურად ამბობენ, გლობალური პროცესებმა და ენერგორესურსების გაძვირებამ ფასზე გავლენა შეიძლება მომავალში მოახდინოს.

საპატრიარქოსთვის გაუგებარია, რა საფუძველი აქვს რუსეთის დაზვერვის განცხადებას, რომ თითქოს მსოფლიო პატრიარქი ბართლომეოსი საქართველოს ეკლესიაზე გავლენის გაძლიერებას ცდილობს და პატრიარქის თანამდებობაზე ორ კანდიდატს უჭერს მხარს.

სტრატეგიული ანალიზის ცენტრის გეოპოლიტიკური კვლევების ხელმძღვანელი, ვახტანგ მაისაია „რეზონანსთან" ამბობს, რომ რუსეთი უკვე პირდაპირ იყენებს „ბასრ ძალას", რაც ქართული საზოგადოების გახლეჩვას გულისხმობს.

პოლიტოლოგი იგორ კვესელავა მიმდინარე პროცესების საუბრისას აღნიშნავს, რომ ქვეყანაში კრიტიკულად მძიმე ვითარებაა და ხელისუფლება ამას ხვდება, ამიტომ ვადამდელ არჩევნებს არ გამორიცხავს, რაც სიტუაციიდან გამოსვლის ერთ-ერთ გზად მიაჩნია. ბიძინა ივანიშვილს კი ურჩევს, ჩრდილიდან გამოვიდეს და არსებულ პრობლემებთან გამკლავებაში უშუალოდ ჩაერთოს.

ოპოზიციური ალიანსი „ეროვნული მობილიზაციის" ორთვიან კამპანიას იწყებს, ეს პროცესი კი კულმინაციას 26 მაისის დაგეგმილი მასშტაბური აქციით მიაღწევს. მმართველ პარტიაში ამბობენ, რომ თარიღის შერჩევა მიზანმიმართულია, რადგან ოპოზიცია დამოუკიდებლობის დღის საზეიმო ვითარების პოლიტიზებას და დაძაბულობის შეტანას ცდილობს.

ელექტროენერგიის გადასახადის ნახტომისებრი ზრდა სოციალურ ფონს  ძალიან დაამძიმებს. მომსახურებისა და წარმოების სფეროში ყველა მიმართულებით ფასების მატებას გარდაუვალი. მოიმატებს ინფლაციაც, რაზეც ენერგეტიკოსები და ეკონომისტები დაუფარავად საუბრობენ. 

ავტობიზნესით დაკავებული ადამიანებისა და დილერების პროტესტის მიუხედავად, მდგომარეობა უცვლელია. დიდი ალბათობით, ავტომობილების იმპორტთან და განბაჟებასთან დაკავშირებული ცვლილებები აპრილიდან ამოქმედდება. სფეროში დასაქმებულები ფიქრობენ, რომ ეს, პირველ რიგში, პრობლემებს შეუქმნის ავტობიზნესში დასაქმებულებს, რაც საბოლოო ჯამში ქვეყანაში უმუშევართა რაოდენობას და მიგრაციას კიდევ უფრო გაზრდის.  

ხუდონჰესის აშენების გადაწყვეტილება საბოლოოდ ურყევია და მთავრობას ქვეყნის ენერგეტიკისთვის მნიშვნელოვან პროექტების განხორციელებას სწორედ ამ გიგანტური ჰესით დაიწყებს. ამის მთავარი პირობაა, რომ  მოსახლეობის ნდობა მოიპოვონ, რა მიმართულებითაც მუშაობა გააქტიურდება. კონკრეტულად რა შეიძლება ადგილობრივებს შესთავაზონ, უცნობია, თუმცა სპეციალისტები ფიქრობენ, რომ სავარაუდოდ, ეს იქნება სოციალური გარანტიები, ფულადი კომპენსეციები და დასაქმების პერსპექტივა. პარალელურად გარკვეული ინფრასტრუქტურული პროექტებიც შეიძლება განხორციელდეს.

თურქეთის თავდაცვის სამინისტროს განცხადებით, ირანიდან გაშვებული ბალისტიკური რაკეტა თურქეთის საჰაერო სივრცეში შევიდა და აღმოსავლეთ ხმელთაშუა ზღვის რეგიონში განთავსებულმა ნატოს თავდაცვის სისტემებმა განეიტრალეს.

შეერთებული შტატები ამ ეტაპზე უკრაინისთვის განკუთვნილ იარაღს ახლო აღმოსავლეთში არ გადაამისამართებს - აცხადებს უკრაინის პრეზიდენტი ვოლოდომირ ზელენსკი, თუმცა, არ გამორიცხავს, რომ ირანში მიმდინარე ომის ხანგრძლივობამ და რეგიონში სამხედრო საჭიროებებმა ვაშინგტონის შემდგომი გადაწყვეტილებები შეცვალოს.

ესპანეთმა ირანზე თავდასხმებში ჩართული აშშ-ის თვითმფრინავებისთვის თავისი საჰაერო სივრცე დახურა, - ამის შესახებ ქვეყნის თავდაცვის მინისტრმა, მარგარიტა რობლესმა ჟურნალისტებს განუცხადა. „არ ვიძლევით არც სამხედრო ბაზების გამოყენების და არც საჰაერო სივრცის გამოყენების უფლებას ირანში ომთან დაკავშირებული ქმედებებისთვის", - განაცხადა მინისტრმა.