ოპოზიციური ალიანსი ორი თვის შემდეგ თბილისში მასშტაბური აქციისთვის ემზადება. ხელისუფლებაში კი იმაზე საუბრობენ, თუ რატომ არ შეიყვანეს ამ გაერთიანებაში ექსპრეზიდენტი სალომე ზურაბიშვილი და სავარაუდოდ ვინ გახდება მის ნაცვლად ოპოზიციის ახალი ლიდერი. ამაზე განცხადება პრეზიდენტმა მიხეილ ყაველაშვილმა გააკეთა.

თეირანზე ისრაელის საჰაერო დარტყმებისა და ირანის მიერ ორი ამერიკული საბრძოლო თვითმფრინავის ჩამოგდების პარალელურად, ახლო აღმოსავლეთში ცეცხლის შეწყვეტის მცდელობები ჩიხში შევიდა. ოფიციალური თეირანი უარყოფს როგორც 48-საათიან ზავის წინადადებას, ისე დონალდ ტრამპის მტკიცებას, რომ ირანული მხარე დეესკალაციას ითხოვდა.

სტრატეგიულად მნიშვნელოვან ობიექტზე და აფხაზეთის საზღვართან ახლოს, სოფელ ყულევთან საფრენი აპარატის ფრაგმენტებია აღმოჩენილი. ერთი ვერსიით, ეს არის რუსული სამხედრო ტიპის დრონი, რომელიც ტექნიკური გაუმართაობის გამო შავ ზღვაში ჩამოვარდა და დინებამ ყულევთან გამორიყა. ზოგი არც იმას გამორიცხავს, რომ ეს უკრაინული დრონი იყოს.

ტრამპის ადმინისტრაციაში სულ უფრო რეალისტურ სცენარად აღიქვამენ ნატო-დან აშშ-ს გამოსვლას, მათ შორის საუბრობენ იმაზეც, რომ შესაძლოა ჩრდილო-ატლანტიკური ალიანსის ჩანაცვლება გახდეს საჭირო და ალტერნატიული, უფრო ძლიერი სამხედრო გაერთიანება შეიქმნას.

მიუხედავად ხუთკვირიანი ინტენსიური ავიაიერიშებისა, ირანი სამხედრო შესაძლებლობების მნიშვნელოვან ნაწილს ინარჩუნებს - აშშ-ის დაზვერვის შეფასებით, სარაკეტო გამშვები სისტემების დაახლოებით ნახევარი და ათასობით დრონი კვლავ მზადყოფნაშია, რაც რეგიონში ესკალაციის რეალურ საფრთხეს აჩენს.

პარლამენტის თავმჯდომარე შალვა პაპუაშვილმა ეკლესიასა დ ქვეყნის შიდა საქმეებში ჩარევაზე ისაუბრა და აღნიშნა, რომ დღევანდელი ოპოზიცია საქართველოს დამოუკიდებლობის მტერია, რაზეც მიუთითებს უცხოეთში მათი გახშირებულ ვიზიტები. პაპუაშვილი მიუსაფარ ძაღლებზე ატეხილ სკანდალებსაც გამოეხმაურა და განაცხადა, რომ „ამაზე დიდი პრობლემა ემოციურად დაზიანებული რადიკალური ოპოზიციაა".

„ქართული ოცნების" მხრიდან უკვე ერთხელ უარყოფილი დიალოგის მიუხედავად, პარტია „ლელო" კვლევ მიიჩნევს, რომ პოლიტიკური კრიზისიდან ერთადერთი გამოსავალი მოლაპარაკებებია რიგ საკითხებთან მიმართებაში და შესაბამისად ხელისუფლებასთან დიალოგი.

იმის გამო, რომ ტრამპმა ვერ მოახერხა ნატოს დარწმუნება, ირანთან კონფლიქტში მხარი დაეჭირა, ალიანსიდან გასვლით და ორგანიზაციის განადგურებით იმუქრება. ნატოს ოფიციალური პირები ხუთ სავარაუდო გზასაც ასახელებს, თუ როგორ შეუძლია ტრამპს შური იძიოს. მათ შორის განხილება რიტორიკის გაძლიერება, ამერიკული ჯარების გაყვანა და „რბილად" ან „რთულად" გასვლა.

პროდუქტების მოსალოდნელი გაძვირების ფონზე, მთავრობამ წამლებთან დაკავშირებით პრევენციული ზომა უკვე მიიღო და რამდენიმე ასეული მედიკამენტის, როგორც საბითუმო, ასევე საცალო რეფერენტული ფასების ზედა ზღვარი დააწესა. თუმცა, ჩნდება ლოგიკური კითხვა - რა საჭიროა რეფერენტული მედიკამენტების ნუსხის დრო და დრო განახლება, ხომ შეიძლება, ერთხელ და სამუდამოდ დადგინდეს წამლების ფასის ზედა ზღვარი. აი, სწორედ აქ გაიყო სპეციალისტების აზრი - ერთი ნაწილი თვლის, რომ რამდენიმე ასეული მედიკამენტის დამატება საერთო სურათს ვერ შეცვლის, ხოლო მეორე ნაწილის აზრით, რეფერენტული ფასები მეზობელი და შესადარი ქვეყნების ბაზრებზე არსებული მდგომარეობის მიხედვით დგინდება, რისთვისაც ამ ნუსხის პერიოდულად განახლება აუცილებელია. 

10 დღეში უნგრეთში საპარლამენტო არჩევნებია, რომელსაც ევროპელი ანალიტიკოსების უმრავლესობა ქვეყნისთვის გადამწყვეტ მომენტად მიიჩნევს. გამოკითხვები აჩვენებს, რომ 16 წლის განმავლობაში ძალაუფლებაში მყოფი პრემიერ-მინისტრი ვიქტორ ორბანი თავის პოლიტიკურ კარიერაში ყველაზე დიდ გამოწვევას წინაშე დგას, ხოლო საგარეო საქმეთა მინისტრ პეტერ სიიარტოს რუსეთთან დაკავშირებული სკანდალი მმართველი პარტიის წარმატების შანსებს კიდევ უფრო ამცირებს.

სომხეთში დაგეგმილ საპარლამენტო არჩევნებამდე 2 თვით ადრე, პრემიერ ნიკოლ ფაშინიანისა რუსეთის პრეზიდენტ ვლადიმირ პუტინის შეხვედრა მცირე სკანდალით დასრულდა. პუტინმა სომხეთის ლიდერს პრაქტიკულად ღიად მოსთხოვა, რომ არჩვნებში მონაწილეობა მიიღონ პრორუსულმა ძალებმა და მათ შორის პატიმრობაში მყოფმა პოლიტიკოსებმა, რაზეც პასუხად მიიღო, რომ სომხეთში პოლიტიკურ პროცესებში ჩართული პირები პატიმრობაში არ არიან, ხოლო არჩევნებში მონაწილეობა მხოლოდ სომხეთის მოქალაქეებს შეუძლიათ.

მიუსაფარ ძაღლებზე ამტყდარ სკანდალმა უკვე პოლიტიკური სახე მიიღო. უფლებადამცელების მტკიცებას, რომ სურსათის ეროვნულმა სააგენტომ ქუჩიდან აყვანილი ცხოველები გორის კრემატორიუმში ცოცხლად დაწვა, გარემოს დაცვისა და სოფლის მეურნეობის მინისტრი გამოეხმაურა. დავით სონღულაშვილმა გავრცელებულ ცნობებს ტყუილი უწოდა და განაცხადა, რომ დეფინფორმაციის გავრცელებაში ყველა პასუხს აგებს. ცხოველთა მოყვარულები კი, თბილისსა და ბათუმში აქციას მართავენ.