ახლო აღმოსავლეთში კვლავ რთული ვითარებაა. ისარელმა ირანის დედაქალაქ თეირანში საჰაერო დარტყმების ახალი ტალღა დაიწყო და ომის გაგრძელება დაანონსა. სავარაუდოდ, ლიკვიდირებულია ირანის ისლამური რევოლუციის გუშაგთა კორპუსის პრესსპიკერი. ირანის ახალი უზენაესი ლიდერი აიათოლა მოჯტაბა ხამენეი, პრეზიდენტისთვის გაგზავნილ წერილში აცხადებს, რომ „ქვეყნის მტრებს უსაფრთხოება არ უნდა ჰქონდეთ". არაბთა გაერთიანებული საამიროების, ქუვეითის, საუდის არაბეთისა და ბაჰრეინის ტერიტორიებზე კი სარაკეტო და დრონებით თავდასხმები გრძელდება.

ირანს უკვე არაბული სახელმწიფოებიც ემუქრებიან და მის წინააღმდეგ საბრძოლო მოქმედებების დაწყებას არ გამორიცხავენ. ამ მხრივ განსაკუთრებით მკაცრი განცხადებები კეთდება კატარსა და საუდის არაბეთში. მეორეს მხრივ, ირანს აშშ-ის პრეზიდენტი დონალდ ტრამპიც აფრთხილებს საპსაუხო მოქმედებების შესახებ. ირანი კი, მედიის ინფორმაციით, რეგიონში არსებულ ქვეყნებს გამოფხიზლებისკენ მოუწოდებს.

ახლო აღმოსავლეთში ომის დაწყების შემდეგ ნავთობისა და ბუნებრივი გაზის ფასები რეკორდულად გაიზარდა, მთავრობები საწვავის ეკონომიის მკვეთრ ზომებს იღებენ, გლობალური აქციები 5.5%-ით დაეცა, ეკონომისტები მსოფლიოს აფრთხილებენ, რომ ეს ომი ინფლაციური რისკების შემცველია, პარალელურად, კი ირანული მხარე ამტკიცებს, რომ „ახლო აღმოსავლეთში ომის გლობალური შედეგები ყველას დააზარალებს."

უკრაინის პრეზიდენტის ვოლოდიმირ ზელენსკის განცხადებით, უკრაინას, ახლო აღმოსავლეთში მიმდინარე ომის გამო, რუსეთთან საბრძოლველად რაკეტების დეფიციტი ემუქრება.

ძალიან მალე რაღაცას გავაკეთებთ კუბასთან მიმართებაში, - ამის შესახებ აშშ-ის პრეზიდენტმა, დონალდ ტრამპმა თეთრ სახლში მედიასთან საუბარში განაცხადა. კუბის პრეზიდენტი, მიგელ დიას-კანელი კი ამბობს, რომ ნებისმიერი გარე აგრესორი მტკიცე წინააღმდეგობის წინაშე აღმოჩნდება.

ბოლო ხუთი წლის განმავლობაში ჩინეთის ეკონომიკა საშუალოდ წლიურად 5,4%-ით გაიზარდა, რაც გლობალური ეკონომიკური ზრდის თითქმის 30%-ს შეადგენს - ეს უფრო მეტია, ვიდრე „დიდი შვიდიანის" ქვეყნების ჯამური წვლილი. ჩინეთი დღეს მსოფლიოს უდიდეს პოტენციურ მომხმარებელთა ბაზარს და უმსხვილეს განვითარებად ეკონომიკას წარმოადგენს - ასეთი განცხადება ჩინეთის საგარეო საქმეთა მინისტრმა და პოლიტბიუროს წევრმა ვან ი-მ სახალხო კონგრესის მე-14 მოწვევის მეოთხე სესიის ფარგლებში გამართულ კონფრენციაზე გააკეთა.

რუსეთის თავდაცვის სამინისტროს ცნობით, ქვეყნის საჰაერო თავდაცვის სისტემებმა ღამით რუსეთის ოლქების თავზე 145 უკრაინული დრონი ჩამოაგდეს, - ინფორმაციას რუსული მედია ავრცელებს. „ღამის განმავლობაში, 15 მარტს, მოსკოვის დროით 23:00 საათიდან 16 მარტს, მოსკოვის დროით დილის 8:00 საათამდე, რუსეთის საჰაერო თავდაცვის სისტემებმა 145 უკრაინული უპილოტო საფრენი აპარატი მოიგერიეს და გაანადგურეს", - ნათქვამია უწყების განცხადებაში.

უკრაინაში ომის დასრულებისა და ევროპისთვის იაფი ენერგომომარაგების აღდგენის მიზნით, ბელგიის პრემიერ-მინისტრი ბარტ დე ვევერი ევროკავშირს რუსეთთან მოლაპარაკებების დაწყებისკენ მოუწოდებს. მისი განცხადებით, ბევრი ევროპელი ლიდერი ამ პოზიციას პირად საუბრებში იზიარებს, თუმცა, საჯაროდ ამის თქმას ვერ ბედავს, მაშინ როდესაც ევროკავშირში საკითხზე მკვეთრად განსხვავებული პოზიციები იკვეთება.

იაპონიას ჰორმუზის სრუტის გახსნაში დახმარების შესახებ ოფიციალური თხოვნა არ მიუღია, თუმცა განიხილავს, თუ როგორ უპასუხოს სათანადოდ, - ამის შესახებ ქვეყნის პრემიერ-მინისტრმა სანაე ტაკაიჩიმ განაცხადა.

ახლო აღმოსავლეთში ირანის დაპირისპირება აშშ-ისრაელთან და უკრაინა-რუსეთის ომი შესაძლოა ერთმანეთთან გადაიკვეთოს. ირანში მიიჩნევენ, რომ უკრაინა მათ წინააღმდეგ ომში ჩაერთო და შესაბამისად, უკრაინის ტერიტორია ირანის „ლეგიტიმურ სამიზნედ" იქცა. თუმცა, ანალიტიკოსები ასეთ სცენარს ამ ეტაპზე ნაკლებად რეალურად მიიჩნევენ.

გლობალურ ნავთობბაზარზე ისევ კრიზისია - ირანიდან მომავალი საფრთხის გამო, ჰორმუზის სრუტეში გადასვლა თითქმის შეუძლებელია. პრეზიდენტი დონალდ ტრამპი აცხადებს, რომ აშშ-ს საზღვაო ძალები მალე უსაფრთხო ესკორტს უზრუნველყოფენ, თუმცა ექსპერტები მიიჩნევენ, რომ ეს რთული და რისკიანი ოპერაცია იქნება.

შეერთებული შტატების მიერ სანქცირებული რუსული ნავთობის შეძენის 30-დღიანი შეღავათის გაცემა ვაშინგტონს მოკავშირეებთან რთული დილემის წინ აყენებს: მიუხედავად იმისა, რომ აშშ ახლო აღმოსავლეთის დაძაბულობის ფონზე ენერგომატარებლების ფასების სტაბილიზაციას ცდილობს, ევროპელები უკმაყოფილონი არიან და ამბობენ, რომ რუსეთისთვის სანქციების მოხსნის დრო ახლა, ნამდვილად, არ არის.