საქართველოს ეკონომიკისა და მდგრადი განვითარების მინისტრის, მარიამ ქვრივიშვილის განცხადებით, საქართველოს მთავრობა ქვეყნის სატვირთო გადაზიდვების გამტარუნარიანობის გაზრდის მიზნით რკინიგზის მოდერნიზაციასა და ანაკლიის ღრმაწყლოვანი პორტის განვითარებას აქტიურად აგრძელებს, ხოლო ყირგიზეთი-ჩინეთი-უზბეკეთის ახალი სარკინიგზო მარშრუტი შუა დერეფანში ტვირთნაკადების ზრდას და საქართველოს სატრანზიტო როლის კიდევ უფრო გაძლიერებას შეუწყობს ხელს.

„ჩვენ ძალიან დიდ რესურსს ვდებთ იმისთვის, რომ საქართველოს ტვირთნაკადის გამტარუნარიანობა წლიდან წლამდე გაიზარდოს. საქართველოს რკინიგზის მოდერნიზაციის ძალიან დიდი გეგმა გვაქვს, იმისთვის, რომ უახლოესი წლების განმავლობაში საგრძნობლად გავზარდოთ არსებული ტვირთნაკადის გამტარუნარიანობა და მათ შორის შევამციროთ გადაკვეთის და მოძრაობის და მობილობის დრო და პერიოდი. ასევე ძალიან მნიშვნელოვანი ინიციატივაა ის, რაც აქვს ყირგიზეთს, ჩინეთსა და უზბეკეთს, რომლითაც მოხდება სარკინიგზო ხაზით დაკავშირება ამ სამი ქვეყნის. ეს პირდაპირპროპორციულად დადებითად აისახება ჩვენს ქვეყანაზე, რადგან ეს მარშრუტი შეუერთდება შუა დერეფნის ამ მთლიან კონტექსტს და აღნიშნული ინიციატივის ფარგლებში შეიძლება დღეს თამამად ითქვას, რომ დაახლოებით 2031 წლიდან საგრძნობლად მოიმატებს შუა დერეფანში ტვირთნაკადი და, რა თქმა უნდა, მნიშვნელოვანია, რომ ყველა ქვეყანა მზად დახვდეს აღნიშნულ ინიციატივას“, - განაცხადა მარიამ ქვრივიშვილმა ჟურნალისტებთან ყირგიზეთში სამთავრობო დელეგაციის ვიზიტის შეფასებისას.