ცხრა შეხვედრა გვქონდა ჯანდაცვის მინისტრთან, ცხრავე შეხვედრა იყო ერთსა და იმავე ტონალობაში, ერთი და იგივე სიტყვებით. მარტო ხელის ბრახუნი მაგიდაზე. ის, რომ წამლები ძვირია, რომ არ აქვს სახელმწიფოს იმის შესაძლებლობა, რომ დაგვაკმაყოფილოს და წამლები შემოიტანონ ამ ბავშვებისთვის. არც კი მოგვისმინა მშობლებს, ისე უტიფრად გვეუბნებოდა, რომ არ გააკეთებს და მორჩა, - ამის შესახებ დიუშენის კუნთოვანი დისტროფიის მქონე ბავშვის დეიდამ, თეონა თედელაურმა “პალიტრანიუსის” გადაცემა “360 გრადუსში” განაცხადა.

თედელაურის თქმით, რაც დღეს ჯანდაცვის მინისტრმა პარლამენტში ინტერპელაციის წესით მოსმენისას განაცხადა, ყველაფერი ტყუილია.

“სარჯველაძე ტყუის. ყველა სიტყვა, რომელიც დღეს მისგან მოვისმინეთ ტელევიზიით, იყო ტყუილი. ადამიანი გამოვიდა და იძახის, წამლები კი არ უშველით, სამი წლით გადაავადებს დაავადებასო. სამი წელი გადაავადებს რას ნიშნავს? სამი წელი ბავშვის ჯანმრთელობა იქნება სტაბილურად შენარჩუნებული.

ჩვენ არარეალურს არაფერს არ ვითხოვთ. ევროპასა და ამერიკაში უკვე არის ჩაშვებული წამალი, რომელსაც იღებენ სხვა ბავშვები და გაუმჯობესებული აქვთ მოტორიკა, გამოდის მინისტრი და იძახის, ჯერ მარტო ვირთხებზე არის კვლევა ჩატარებულიო, კარგად მოიძიოს ინფორმაცია. ასე "დაგუგლული" ინფორმაციებით ლაპარაკს თავი დაანებოს და რეალობა რაც არის, ის ილაპარაკოს.

მე მყავს ექიმი ამერიკაში, რომელმაც ჩემს დისშვილს გაუკეთა გენური თერაპია, შემიძლია უშუალოდ იმ ქალს დავაკავშირო და მასთან გაიაროს კონსულტაცია, მაგრამ ჩვენთან კომუნიკაციაზე აღარ გამოდის, ჯდება თავის ტელევიზიებში და თავისთვის ლაპარაკობს.

მშობლები ვითხოვთ, მოგვიყვანოს ექიმები, მოვიდეს თვითონაც, დაგვიჯდეს და ღია დებატებში ვისაუბროთ. ამას არ აკეთებს”, - განაცხადა თეონა თედელაურმა.