ეკონომიკის სამინისტროს ინფორმაციით, 15 ივლისიდან შანხაი-თბილისის მიმართულებით პირდაპირი ფრენები იწყება. მათი ცნობით, მოლაპარაკებები ჩინური ავიაკომპანია China Eastern Airlines-თან  ჩინეთის სახალხო რესპუბლიკაში მარიამ ქვრივიშვილის ვიზიტის ფარგლებში გაიმართა.

ინფორმაციაში აღნიშნულია, რომ ავიარეისები შანხაი-თბილისი-შანხაის საჰაერო ხაზზე კვირაში 3 სიხშირით შესრულდება.

"როგორც მინისტრმა განაცხადა, თბილისი-შანხაის მიმართულებით პირდაპირი ფრენების დაწყება არის კიდევ ერთი დემონსტრირება იმისა, რამდენად მაღალ დონეზეა ქვეყნებს შორის პოლიტიკური და ეკონომიკური კავშირები. მარიამ ქვრივიშვილის შეფასებით, ეს გადაწყვეტილება გააძლიერებს ხალხთაშორის ურთიერთობებს, ეკონომიკურ კავშირებს, საქართველოს ტურიზმის ინდუსტრიას და დამატებითი შემოსავლების გენერირებას შეუწყობს ხელს. 

შეხვედრაზე აქცენტი გაკეთდა საქართველოს ოფიციალური პარტნიორი ქვეყნის სტატუსზე აზიის ერთ-ერთ ყველაზე პრესტიჟულ და მასშტაბურ ტურისტულ გამოფენაზე ITB China 2026, რომელიც მიმდინარე წლის 26–28 მაისს შანხაიში გაიმართება და მნიშვნელოვნად შეუწყობს ხელს საქართველოს ტურისტული პოტენციალის პოპულარიზებას", - ნათქვამია ინფორმაციაში.