„ერთიანი ნაციონალური მოძრაობის" საერთაშორისო ურთიერთობის მდივანმა, ზურაბ ჭიაბერაშვილმა „ევროპის სახალხო პარტიის" რეზოლუციაში მოითხოვა ცვლილება, რომ სანქციების რეჟიმი რუსეთზე უნდა გავრცელდეს არა მხოლოდ უკრაინაში მისი ქმედების გამო, არამედ იმის გამო, რასაც ის აკეთებს საქართველოსა და მოლდოვაში. ინფორმაციას ამის შესახებ "ნაციონალური მოძრაობა" ავრცელებს. მათივე ინფორმაციით, „ევროპის სახალხო პარტიამ" ცვლილებას მხარი დაუჭირა. ამასთან, ჭიაბერაშვილის განცხადებით, საქართველოს მთავრობის პოზიცია არ არის თანხვედრაში ევროკავშირის საგარეო პოლიტიკასთან. „არცერთი ქვეყნის ბედი ისე არ არის დამოკიდებული უკრაინაზე, როგორც საქართველოსი და ღრმად მწამს, რომ უკრაინა გაიმარჯვებს. უკრაინა იქნება წარმატებული და უკრაინის გამარჯვება იქნება საქართველოს გამარჯვებაც. ვწუხვარ, რომ საქართველოს მთავრობის პოზიცია არ არის თანხვედრაში ევროკავშირთან - ევროკომისიის 9 რეკომენდაციაში მოცემულია პუნქტი, რომ საქართველოს საგარეო პოლიტიკა თანხვედრაში უნდა იყოს ევროკავშირის საგარეო პოლიტიკასთან. რუსეთის ფედერაცია არღვევს არა მხოლოდ უკრაინის ტერიტორიულ მთლიანობას, არამედ მოლდოვის და საქართველოს ტერიტორიულ მთლიანობას. სამივე ქვეყანა არის ევროკავშირის წევრობის კანდიდატი ქვეყანა და ამ რეზოლუციაში აუცილებელია, რომ ნახსენები იყოს საქართველო და მოლდოვა და გთავაზობთ ცვლილებას ამ თვალსაზრისით", - აცხადებს ჭიაბერაშვილი.