საფინანსო და სადაზღვევო საქმიანობა, ინფორმაცია და კომუნიკაცია, სამთო-მოპოვებითი მრეწველობა, ტრანსპორტი - ეს ის მიმართულებებია, რომლებმაც საქართველოს ეკონომიკის ზრდაში მნიშვნელოვანი წვლილი შეიტანა. ივლისში ეკონომიკურმა ზრდამ 8 პროცენტი შეადგინა. ოფიციალური განახლებული მონაცემები სტატისტიკის ეროვნულმა სამსახურმა გამოაქვეყნა.
საანგარიშო პერიოდში, იანვრიდან ივლისის ჩათვლით, ეკონომიკური ზრდის მაჩვენებელმა 7,9 პროცენტი შეადგინა.
სტაბილური და თანმიმდევრული პოლიტიკის შედეგებზე საუბრობენ მთავრობის ეკონომიკურ გუნდში. აღმასრულებელ ხელისუფლებაში აცხადებენ, რომ ქვეყანაში არსებული დადებითი დინამიკა მომავალთან დაკავშირებით ოპტიმისტური მოლოდინების საფუძველს იძლევა. აქცენტი კეთდება ადგილობრივი ექსპორტის რეკორდულ მაჩვენებლებზე, რაც საქართველოსთვის ერთ-ერთ მნიშვნელოვან დადებით ტენდენციად სახელდება.
ეკონომიკის დინამიურ განვითარებაზე აკეთებენ აქცენტს ანალიტიკოსებიც. ექსპერტების შეფასებით, გლობალური გამოწვევების ფონზე, საქართველოს ეკონომიკა სწრაფი ტემპით ვითარდება.
ეკონომიკური ზრდის შესახებ განახლებულ მონაცემებს სტატისტიკის ეროვნული სამსახური ყოველი თვის ბოლოს აქვეყნებს.