გასული სამი წელი იყო გამორჩეულად წარმატებული ჩვენი ქვეყნისთვის, მოვახერხეთ მშვიდობის, სტაბილური გარემოს შენარჩუნება ქვეყანაში, ჩვენ მოვახერხეთ და ნომინალური ეკონომიკა გავაორმაგეთ. ეს იყო ის წარმატებები, რომელიც პირველ რიგში დაკავშირებულია მთავრობის საქმიანობასთან, რა თქმა უნდა, პირველ რიგში პრემიერ ირაკლი ღარიბაშვილის საქმიანობასთან და ამ წარმატებაში განსაკუთრებული წვლილი მიუძღვის მთავრობის თითოეულ წევრს - ამის შესახებ პრემიერ-მინისტრობის კანდიდატმა, ირაკლი კობახიძემ განაცხადა.
როგორც კობახიძემ განმარტა, მიღწეული შედეგების მიხედვით, მან ყველა მინისტრს შესთავაზა თანამდებობაზე დარჩენა, შესაბამისად, მინისტრთა კაბინეტის შემადგენლობაში მხოლოდ ერთი ცვლილება მოხდება და ჯუანშერ ბურჭულაძეს ირაკლი ჩიქოვანი შეცვლის.
"როდესაც საუბარი გვქონდა გუნდში მთავრობის ფორმირებასთან დაკავშირებით, მინდა ხაზი გავუსვა იმას, რომ მთავრობის თითოეულ წევრს, ყველა წევრს შევთავაზე დარჩენა. ერთადერთი, თავდაცვის მინისტრის, ჯუანშერ ბურჭულაძის პოზიცია იყო, რომ მას სურდა პოლიტიკიდან სხვა სფეროში გადანაცვლება, მე პატივს ვცემ მის გადაწყვეტილებას. შესაბამისად, ერთადერთი ცვლილება განხორციელდება საქართველოს მთავრობაში, თავდაცვის მინისტრის თანამდებობაზე წარდგენილი იქნება ირაკლი ჩიქოვანის კანდიდატურა." - აღნიშნა ირაკლი კობახიძემ.